Memòria de cosina : de talhièrs intergeneracionals dins Tarn per las papillas e per la lenga

Lo CIRDÒC, en partenariat amb la Maison Familiale et Rurale (MFR) de Peiregós, las edicions Édite-moi, EP les gourmands e l’IEO de Tarn, organiza per l’annada 2018-2019, mercés al sosten de la Conferéncia dels Finançaires per la Prevencion de la Pèrda d’Autonomia e del Departament de Tarn,  una seria de talhièrs intergeneracionals e bilingës per descobrir, tastar e transmetre lo patrimòni gastronomic tarnés.  Al fial de 10 talhièrs practics de cosina e de 10 talhièrs “memòria” de conversacion e de collectatge, los participants, joves e mens joves, contribuisson aital a la conservacion e a la transmission d’aquel patrimòni cultural. Des ressorsas partejadas sus Occitanica e un obratge difusit gratuitament permetràn d’immortalizar aquestes escambis.

Memòria de cosina :  lo patrimòni culinari per manjar coma cal, manjar local, manjar de sason

Redescobrir e transmetre lo gost de se noirir coma cal, entemenar d’escambis intergeneracionals e interculturals, donar d’oportunitats de socializacion, difusir aquestes sabers alprèp dels professionals e dels amators de cosina, aquí avètz los mèstres mots d’aquel projècte qu’associa de Tarneses de 60 ans o mai e de joves en formacion professionala en alternància dins los sectors del servici a la persona.

Rendètz-vos en abril de 2019 a la MFR per una granda fèsta de restitucion dels talhièrs.

Aquestes talhièrs son meses en plaça per lo Centre Interregional de Desvolopament de l’Occitan amb lo sosten financièr de la Conferéncia dels Finançaires per la Prevencion de la Pèrda d’Autonomia de Tarn, en partenariat amb lo Departament de Tarn e l’Agencia Regionala de Santat.

 

TwitterFacebookLinkedInPinterestTumblrEmail